ფრინველებზე დაკვირვების ფესტივალი

შემდეგმა გამოწვევამაც არ დაახანა. აჭარის ტურიზმის დეპარტამენტის დაკვეთით შემოდგომაზე, ბათუმში, ფრინველებზე დაკვირვების ფესტივალის გახსნისთვის შთამაგონებელი აუდიო-ვიზუალური შოუ და ინტერაქციული თამაში უნდა შეგვექმნა.

ფესტივალის მთავარი ღონისძიება სასტუმრო რედისონის საკონფერენციო დარბაზში უნდა გამართულიყო. რადგან კონფერენციის თემა ფრინველები იყო, გადავწყვიტეთ პროექციით დაგვეფარა მისი ჭერი, ხოლო გამოსახულების ცენტრალური ნაწილი უზარმაზარ LED ეკრანზე გაგვეშვა, იმგვარად, რომ მოქმედება ჭერში იწყებოდა, LED ეკრანზე გადადიოდა და იქ ვითარდებოდა. ხელოვნური ინტელექტის დახმარებით, დოკუმენტური მასალით და 3D გენერირებით შევქმენით მოკლემეტრაჟიანი შთამაგონებელი ფილმი, რომელიც კონფერენციის გახსნის წინ ვუჩვენეთ სტუმრებს. ჭერი მთლიანად დაიფარა პროექციით, სადაც ცის და გადამფრენი ფრინველების გამოსახულება გადიოდა. რეალისტური ეფექტის მისაღებად, ჭერში განთავსებული განათების უზარმაზარი მინის პანელები გამოვიყენეთ. მასზე გაშვებული პროექცია იმგვარ ეფექტს ქმნიდა, როდესაც ჭერში იყურებოდი, გეუფლებოდა განცდა, რომ შენ თავზე ჭერი არ იყო და მართლაც ცას და ცაში მფრენ ფრინველებს უცქერდი.

შესვენებისას კი დამსწრეებს საშუალება ჰქონდათ ეთამაშათ სპეციალურად ამ ღონისძიებისთვის შექმნილი ინტერაქციული თამაში, რომელიც ბუნებაში ჩიტებზე დაკვირვების სიმულაციას წარმოადგენდა.